2015年7月23日星期四

多個心眼

報紙話近日多咗詐騙電話,絕對認同。以前關於詐騙電話只係得個知字,有點遙遠有點不關己事。但近日有兩位同事都說自己阿媽收到有關電話,說兒子有事,要二十萬救人,仲要不是打一次。幸好兩位阿媽都是醒目人,沒有出事,但就被嚇得心慌慌,其中一個更要轉電話號碼。

到我自己了,就是上星期某傍晚時段,有人打嚟家中電話,對方報稱是香港長者服務中心,問家中是否有六十歲以上的長者,我反問對方問嚟做咩,對方說如果有六十歲以上長者,要發張長者咭給長者使用,所以需要長者的個人資料,我聽完沒有答她家中有沒有長者,只是說,哦,不用了。點知被對方大返轉頭,而家唔係你要唔要,係如果家中有長者,你要報架!(佢以為會嚇到我罷)而我大聲過她說︰我話唔要就唔要!然後收線。哈,約十五分鐘後又係嗰個未脫盡鄉音的女人打嚟,又係同一番開場白,那刻我立即想到萬一阿媽接多幾次這電話呢?我提很高聲線說︰你頭先已打過嚟了,已同你講咗唔需要你嘅服務,唔好再打嚟啦!

到了第二天,又有人打去屋企,這次我上班中,阿媽聽的電話。對方說阿媽打電話打去佢的手機,阿媽近年早已大不如以前了,很多事即時已記不起,對方一問,想都不想就說可能我打去俾個女打錯咗去你度,然後對方問咁你女咩電話號碼,阿媽竟然就話俾對方知了,唉,講完之後先知驚,想到平日我交待她的,才即刻打電話俾我告知事由。

嗯,要效仿一同事做法,她昨天說的,就是和阿媽定好暗語,如果有這類救人電話,要先說暗語。唉,真是的,如此世道。


沒有留言:

Related Posts Plugin for WordPress, Blogger...