2010年12月9日星期四

這麼痛,那麼愛

繼續講番去MB的又愛又恨情意結。

之前講過,剩係去做人手淋巴引流及BODY按摩,是我很喜歡的部分,最緊要係我一個月去一至二次,每次做二節,哩道講緊都係一個月俾三幾百元的事,身體好咗,極少睇醫生了,值得呀!但世事邊有咁完美架!入得去「美女」如雲、「人才」濟濟的國度,任憑周身功力,都難獨善其身呀!

且看,事先淋浴過的妳,用大毛巾包裹著身體,入到為妳準備好的房間,BODY師或美容師軟語服侍妳睡上小牀,為妳蓋好毛巾被,更體貼哋為妳墊高少少腳部,然後問妳「凍嗎」,再為怕凍的妳開啟暖毯。那一刻,我真的覺得這一生好歹也叫活得不賴!所有惱人凡塵事都可暫且擱下,所謂光脫脫來到這個世界,心無罣礙怕且就是這般的光景,那管是天塌下來,也先滾一旁去吧!

嗱!嗱!嗱!唔好醉呀!在妳思想及身體皆最放鬆的時刻,BODY師或美容師不會讓妳就此甜睡過去,她們會開始和妳閒聊先來個思想交流,然後不經意一句邊度攰啲呀?或,咦,有水腫喎!又或,嗯,妳啲皮膚都KEEP得幾好,有打理下皮膚喎,不過眼仔唔係好夠精神咯!成日夜瞓哩!再或,...我總結到,無論如何打開話匣子的,又無論講緊幾不著邊際的天馬行空之事,她們都有本事向妳言歸促銷公司產品的主題,而整個過程來得是那麼自然,那麼輕鬆。就我自己的經驗,我唔覺得她們是在逼我,反而覺得她們是好人到令我不知如何去拒絕,而且由始至終她們的聲線都是溫溫軟軟的。哪次如果我肯買些甚麼小美容產品,她們會很開心很真誠地多謝妳,就像我剛做了甚麼大好事一樣。我想,如果她們有本事令我願意掏錢出來,那我也只得認了,話之我敗家後悔不當初。但我很清楚,錢呢家嘢,梗係留在自己口袋裏最好啦,況且這類消費在我的消費原則裏是屬於可有可冇的,覺得好嘅,咪少少哋買些套票,隔疏去做下咁咯。抱著這種心態,加上滿臉展示出「我不慣看人面色」的小小寸樣,去到一個階段發覺其實也不太難應付呢!毛毯下的我幾乎一絲不掛,手無寸鐡,但我,還是懂得選擇同樣的軟語溫柔謝絕了向我口袋掏錢。

我唔知係咪MB的促銷文化是走令人客有賓至如歸的路線,定係我自己的經歷只係個別的例子呢?她們的軟功硬銷法,其實在我身上係行得通架!我受咯!我咁講你哋可能以為我一定被人成功推銷過很多次,咁又唔係呀,我剩係有被成功推銷到一些FACIAL套票,但首先是我需要的,因為我諗住去開做人手淋巴引流,就一氣做埋FACIAL啦,唔想再跑另一個地方了,且當時看準經理那天極想開到單的心理,我BARGAIN了個極低的價錢回來。至於其他甚麼熱石呀,做機去水腫呀,乜乜香薰香油呀...五花八門的名堂,我通通婉言拒絕了,也至今未看過她們有甚麼面色,但就感覺到她們的失望,始終,這是她們的事業。但失望歸失望,不管怎樣,她們離開房前,都一定會送上一聲「多謝晒」!

 

12 則留言:

L L 說...

哇,你都夠硬淨咯,我就俾啲促銷電話、面對面勸銷坤咗唔少錢。

the8 說...

我極怕人銷完一樣又一樣,試過去某連鎖鞋店買鞋,已經買了四對(我和表哥一人倆對),個 sales 可能以為我哋好易 sale 於是叫我哋買第五對,表哥面一黑話『你再 sale 我連呢四對都唔買!』,佢即收聲唔再 sale,我知大家都搵啖飯食,但請見好即收吖唔該!

>> 毛毯下的我幾乎一絲不掛,手無寸鐡,但我,還是懂得選擇同樣的軟語溫柔謝絕了向我口袋掏錢。

我笑了,有時諗返起都覺得不可思議,係一個陌生人前面齋蓋一條毛巾,女人為咗靚真係可以拎出好大勇氣。

Coffee 說...

校長︰

啲人緊係知你有錢:p 唔銷給你銷給誰呀?:)

其實我都有唔少呢啲經歷架,當後來發現用不上或不外如是,掉又唔係唔掉又唔係時,從此便可冷靜很多了。

Coffee 說...

the8︰

我第一次上去時是三個早已入會的朋友陪我一齊去的,她們教晒我如何這般,所以又真係冇擔心過,加上全埸冇一個男性,啲女職員亦都很專業,總之還好喇。我諗我之後套票用完時都會繼續再買啲,很喜歡她們的人手淋巴引流,身體排毒好咗。

笑談風月 說...

我對美容推銷很有抗衡力量,我會用醫學知識推翻他們的論據,搞到他們很冇癮,知難易退。
推淋巴會有遞減效應,不宜多做,否則不能斷尾,沒完沒了花錢,我更愛流汗運動促進新陳代謝,推淋巴只是被動運動。

Coffee 說...

風月︰

>>推淋巴會有遞減效應

噢!這我是才知呢!推淋巴的確是給那些缺少運動的人嘅,且推完之後真係覺得成身輕咗。

嗯!我知喇!

韻味熊貓 說...

那些推銷員得寸進丈,唔擋住佢地,乾塘都有份!

Coffee 說...

佛爺︰

中point!!
我常常咁樣回應推銷︰真係好好!不過我冇咁多閒錢來買咯!

Armadillo 說...

以前買過好多份唔係咁需要嘅保險,都係為咗應酬朋友。後來的起心肝,冇用嘅全部cut晒,而且新單一概say no!耳仔軟係自己嘅問題,唔應該乜都賴晒落人地度。都係嗰句:有XX,冇焗賭!

Coffee 說...

Arm︰

係呀!朋友果啲係最難拒絕,特別如果有朋友做傳銷(我有),真係千絲萬縷講唔清!


PS︰有XX,冇焗賭!
我唔知XX係咩?不過唔緊要:)

Ebenezer 說...

所以呢,我打死都唔去dup骨囉!

以前聽d朋友講呀,佢地dup dup下骨,個妹妹仔就會用好溫柔好難拒絕嘅聲線咁去推銷架喇:「老細,要特別服務嗎?」

真係唔係個個都學似妳咁好定力架嘛!!

Coffee 說...

Eben︰

你講果啲dup骨點同呀?有特別服務喎!我哋女性呢啲,純粹架!冇任何特別服務,同埋要睇住自己銀包,緊係要有定力架啦!

Related Posts Plugin for WordPress, Blogger...