2010年12月7日星期二

痛.愛

近日報導有瑜珈中心突然結業,預繳了費用如潑出去的水。我在MB都一樣是預繳了費用的,有冇驚過佢一樣又突然結業?我嘛,驚就唔係驚啦,但有諗過嘅。可以講,今時今日所有這類美容健康中心的經營手法都是同出一轍的,一次過繳交一定金額的費用,叫做入會吧。而金額越大,平均番每次的消費就越平。例如做BODY按摩或人手淋巴引流,每節四十五分鐘,叫價$200一節,然後買到幾多節以上的,可以$150一節。我是較早時期買的套票,前所未有的低價,$100一節,現時應該全港不論大小場都沒有這個價了。抵唔抵就見仁見智了,因為唔去入會才最抵咯。

就講MB呀,全港大小分店多不勝數,但睇下BOOK位有幾難就知佢分店是說多不算多了。咁上美容健康中心是否只是一種流行文化呢?人去我去?以我個人就絕不是的,假如這只是要用金錢來堆砌的時尚,怎會成為我杯茶!講真,去MB做人手淋巴引流或BODY按摩,享受係其次(真係痛架),最重要係令身體質素好咗。以前我幾乎年年睇幾次醫生醫傷風感冒,仲梗有一次喉炎高燒,但TOUCH WOOD講句,由我在MB開始做人手淋巴引流及BODY按摩以來,身體真係好咗好多。你話關唔關事?我自己知自己事,關嘅!我覺得道理咪有點似刮痧一樣咯!就講人手淋巴引流吧,其實幾痛下架,同媽媽捉我刮痧一樣,但做完之後個人又真係精神好多喔!所以值唔值真係非常之見仁見智。

單係去MB做人手淋巴引流或BODY按摩,我是非常喜歡的,痛都是一種好。例如我去開果間MB的場大,印象中未試過要排隊沖涼,而且配套設備等都唔錯,可以講係我覺得可以RELAX到的地方。既然咁好,我的套票價又唔貴(啲人去深圳腳底按摩,車費連小費都唔止呢個數啦),我咪會常去?咁又唔係喎,時間關係,箇中原因下回分解。
 

8 則留言:

笑談風月 說...

買了套票,就要快點用完它,盡量減少損失,這是我的方法。

卡臣 說...

而家人民幣貴咗,少咗人北上揼骨

Coffee 說...

風月︰

到我放假的時候,其他人客都係放假,變咗難book位,唔去開果啲場我又唔想去。

不過MB而家睇應還OK嘅,(希望啦:P)

Coffee 說...

卡臣︰

北上揼骨我試過一次,以後都咪攪!特別而家同MB BODY師的手勢相比,覺得深圳果啲真係有點亂來一通的。:P

韻味熊貓 說...

咖啡:

深圳按摩師,可能原本是餃子館搓麵粉的。嘻嘻!

Coffee 說...

佛爺︰

哈哈..哈..唔知。

我試過的果個女人我估佢以前係種田嘅,鬼咁大力,十零分鐘我已受不了,坐埋一邊等朋友算!

l.minor 說...

其實MB stand for乜野呀?定係妳去開的美容中心名呀?好奇問下

人手淋巴引流係咪即係按d穴道位好痛果d?有時去按摩,d按摩師按到有d位真係痛死,都係買咗套票,好似好用d,不過以前有另一間去開嘅,又係買咗套票,不過佢地有打黎話快d用哂佢,因為佢地會執

深圳果d我就麻麻地,有時覺得佢地亂黎,而且計番車錢,咪又係係番度...

Coffee 說...

Minor︰

MB 即 Minor B. (講笑!)
即Modern Beauty (現代美容,堪稱香港最大美容公司,幾年前上埋市。)

以我咁耐聽聽埋埋︰
人體有淋巴管道,和血管一樣,血液會流通但淋巴唔會,所以身體易有淋巴阻塞的問題。人手淋巴引流就是沿著主要淋巴位道推動,令淋巴道動一動,通一通,不瘀塞毒素。BODY師要受過訓,識用力,我最初期曾試過好痛好痛,話越瘀塞越覺得痛,可能BODY師的力也要大啲,後來唔知係瘀塞情況有改善,定係習慣了,覺得冇咁痛喇。

Related Posts Plugin for WordPress, Blogger...