2010年11月30日星期二

2010年11月28日星期日

友人

今天在深圳布吉大芬油畫村泡了大半天,累得死人!


(補記29-11-2010)
馬不停蹄的一日。晚飯後由深圳灣坐巴士回港,等車時我開返手機,打了六個電話,其中三個冇人接聽。一次冇人聽,問︰唔聽你電話呀?我冇應,二次冇人聽,傾緊計都停下來問︰仲打唔通呀?我擰轉身去,三次打唔通時,都仍然繼續︰打唔通唔好再打啦!
於是我變得好忟,再擰轉下身,拋下一句︰你唔好咁留意我打電話得唔得呀!

我總結到攰係會令我容易忟嘅,忟到今朝都未忟完。返工係地鐡,第一個有藥油味女人就上
半身挨過來挨住晒,第二個大隻男人就半邊Pat貼過來,「俾你哋坐埋佢喇!」。忟死人啦!
 

2010年11月27日星期六

幾個常一起說笑的人

我不是基督徒,但久唔久都有去參加星期日崇拜,所以很多嘢都跟到下嘅,例如唱詩咁,窒下窒下都叫做夾到嘴型。但如果坐了個完全門外人的朋友在身邊,而呢個朋友又是鍾意講笑嘅,咁會點呢?

今日去觀禮,我們四人幾乎最遲才趕到,於是坐在最後果排。

眾立唱詩歌
友(係我耳邊)︰嘩!有九成以上嘅人識唱,咦!你都識唱架?
我︰嗯,少少。
友︰點解你剩係嘴郁,無聲嘅?
我(側眼)︰嘖!喂呀~!(想打佢)

伴郎很有型,又彈琴,又唱歌。
友(興奮中)︰嘩!個伴郎好掂喎,又識彈琴又識唱歌,又咁有型,仲著西裝呀!
我︰你冇病呀?唔通著套運動衫來做伴郎勒喎!
友︰但佢識彈琴喎!識彈琴又著西裝喎!
我(忍笑中)︰喂呀~!你好無聊呀,你想點啫?
友(雀躍中)︰想識佢呀!
我(翻佢白眼)︰你好似有男朋友架荷。
友︰一日未嫁都仲有機會。
我︰冇你咁好氣。

友︰陣間係咪會拋花球架?我驚接唔到喎,點算呀?
我(沒好氣但笑)︰你隔離咪坐咗個跆拳道黑帶四段咯。
友︰係喎!

我終於忍不住要制止佢和跆拳道高手再繼續細細聲商量如何接到花球。

我︰喂,咪再嘈啦!留心聽下啦,全場就係得你二條友係度講  嘢。
友︰咩呀!(跟住用手一指前面,有三條友又係縮低在細聲傾計。)
我(笑)︰你哋再講我話俾新娘知架勒。

二分鐘後
友︰俾我講多樣吖。
我︰咩~呀?
友︰你睇唱詩班果度有個人零零舍舍唔同嘅,高咗個頭出來,但佢個頭好怪咯。

我望過去,即刻知佢講緊邊個,果然係零零舍舍唔一樣,多日沒有修剪的頭髮,溜溜長地包裹住頭部,有如一支火柴頭。一看我已忍不住無聲笑了起來,我右邊友人見我笑,問咩事?
我呢個人好抵死,如果想笑時不能笑就更想笑,所以答唔到右邊友人。講開嘢的友人見狀,即代答︰果邊有個火柴頭人。此時我已無聲地笑出了眼淚。

(新娘子,知妳不會怪我們的,妳太了解我們這幾個朋友了。)

2010年11月25日星期四

懂道歉不是與生俱來的

回家前入了轉惠康,但終於咩都冇買。正準備由收銀旁邊的通道離開,身後不跟媽媽一起排隊購物的一名約四年班男孩,搶先行到我前面。突然果個男孩反手向後一飛自己手上拿著的外衣,外衣正好打在我的臉上,拉鍊扣撞擊我眼鏡片的聲清清楚楚。我沒有出聲,但企定望住個男孩,男孩轉過身來望下我,甚麼都沒有說,快速走去收銀機前等媽媽。我留意到那位媽媽的視線是見到剛才那一幕的,我,以為有人會道歉!我,以為有人會開聲教仔道歉!但,是沒有的!

我忍不住要開聲幫人教一次仔了!我先望了眼那媽媽,然後再望住那男孩,不慍不火地一字一字說道︰小朋友,你件衫打中我喎!(臉帶笑意)
哈!竟然冇反應!大人小孩都一樣。

我收起笑容,用嚴厲的眼神望著男孩,略提高聲線再說一次︰小朋友,你件衫打中我喎!

然後那男孩望住另一邊,對住空氣很不情願很細聲很模糊地說了︰對唔住!

我轉身離開,身後留下一串鄙視給那位時尚的媽媽!為甚麼沒有道歉的文化?不是只有故意犯錯才需道歉的!
 

2010年11月24日星期三

老師的手筆

我很久沒有返畫班了,是我自己放自己假。今晚返到去,老師教畫山水畫,我托住腮眼定定,說︰老師,我真的對畫山水興趣不大(其實係太難),我宣佈放棄。

老師巡堂時,我再對老師說︰老師,我喜歡吳冠中那種江南水鄉畫風,可唔可以幫我畫一張呀?老師片刻停頓後,在我案前提筆落墨。其時嘩聲四起,我樂透了!


2010年11月23日星期二

廚房擺設



 果日,竟然俾我見到呢款玻璃樽,原價$19.9(我一定唔會買),做緊特價傾銷,盛惠$5大元一個。嗨!這類近款式正是我要的,厚度夠,玻璃樽表面有五瓣花圖案。我一心要找這種玻璃樽裝起那些粟米,擺放在廚房做裝飾。其實並非我思想裏有甚麼藝術細胞在作祟,而是那之前提過的粟米(朋友送的),之後又不知如何處置了?最重要因為是糧食,我不想棄掉,在這方面我有小迷信的,驚棄置糧食會冇衣食。 :p

(仍在諗緊整咩型式的玻璃樽塞)

2010年11月22日星期一

感激

讓孩子學琴,是否真的如坊間一些傳說,是為滿足家長的虛榮心?是為了圓家長自己年少時的夢?是為了將來入學加分?我會理直氣壯地說不是,都不是,起碼我不是!
 由小一起,開始為孩子報讀不同的課餘興趣班,一般是同一時間不會多過二樣課程,最多最多都係試過同一時段學三樣的,果三樣係鋼琴、畫畫、游泳(暑假)。學過的「武藝」包括有(排名不分先後)︰鋼琴、跆拳道、游泳、羽毛球、乒乓球、畫畫、珠心算、長笛、體操等(唔知有冇漏)。為何要讓孩子學咁多課外嘢?因為如果唔多方面試下,焉知孩子的興趣在何?咁是否一定要學樣課外「武藝」,是的!這方面的態度我倒是很清晰!

堅持去學任何的課外嘢,都是很辛苦的,這種辛苦不單止對孩子而言,對家長都是一件苦到可嘔血的工程。我讓孩子選,可選任何喜歡的,我的要求是所選的除咗上堂,每星期一定要有二次訓練,每次訓練一小時。還記得誤打誤撞下,曾跟一名師習畫一年多,可惜呢!又在學珠心算時,反問我︰就咁心算都計到了,點解要珠心算咁麻煩?我啞然!還有長笛,是孩子極力要求要學的(睇火影上咗身),而這長笛在一年後被我橫手扼殺,因為功課太多,鋼琴和長笛二者只能活一,而那時孩子已不願放棄鋼琴了。

鋼琴是否我逼孩子學的?我沒有逼孩子學鋼琴,鋼琴是孩子自己決定學的。如果要用「逼」這字眼的話,我承認我有逼,我惟一有逼孩子學習的只是堅持。我認為堅持是人身上很重要的一樣質素,而這質素很依靠後天培養。回想孩子學琴這麼多年來,我講得最多的是,「想你明白世間冇嘢係可以好輕易得到嘅,全部嘢都係自己辛苦下得回來的,想你從中明白要堅持的道理。」。當時還年幼的孩子又反問,「點解一定要堅持學一樣自己覺得辛苦的事?我可以堅持玩遊戲機架!人來到世界就是為了過快樂的生活,為甚麼要做這麼多事令自己不快樂,很傻!以後我可以自己話事時,我一定只做令自己快樂的事。」。


我解說孩子不是很明白的道理,人要先挨得苦才會珍惜快樂,你依然不明白為何有快樂不快樂而要刻意去忍受辛苦。孩子,你不明白的事多著呢!但如果我不趁孩子不能反抗時「逼」孩子學習堅持,我太擔心孩子此生會有太多的半途而廢!如果我不訓練孩子忍受苦楚,我太擔心孩子太迷戀快樂,而喝不下一杯無糖的咖啡!

    PS︰記起還練過籃球。:P
            踢過一年半校隊足球(又是功課太多,須與鋼琴二擇一   而停止。)
            強烈要求要學吉他,我以長笛的前車之鑑拒絕了。

2010年11月21日星期日

EOS 550D(20) 少不更事

(22/11/2010 補誌)
好朋友仔來家,十指穿梭琴鍵間,小小客廳不足空間讓李斯特的「鐘」回響!這朋友仔是習琴途上醒覺點的源動力,我視之為良師,而這良師是否益友,則是我看不清的。

矇矓這種美適用於藝術感覺上,怎麼的矇矓怎麼的美。但生活中有些矇矓,令人擔心!朋友仔的家庭背景良好,就是不知少年人的腦瓜子裏裝著甚麼?聽說到的很多出位行徑令學校社工、家長頭痛不已。反叛少年!你身邊可有?我惟有,希望能一起稱兄道弟,受我玩嗎?兄弟!

就如我在天色矇矓時拍下這張海天一色的景觀,但心中期盼的是陽光下耀目的海平線。


 

2010年11月19日星期五

天空之城(800 人大合唱)

我不特別憎恨日本人,即使有不能磨滅的苦難;我亦從沒有迷戀過東洋文化,即使我曾習日文至能與日本人作日常交談;我更不曾有一刻愛上日本,即使身處那紅葉沒眼泉聲掩耳甚麼也井然有序的國度。


但,我還是被這「天空之城」觸動了!音樂無國界在我細小的心間可見一斑,一度此曲成為我的電話鈴聲,有二、三年之久!

每個人在其生命旅程上,都總會遇上一些非自己能力所及的事。就像當年遇上的,一首「天空之城」將無奈的序幕拉開,即使其後賠上萬千的真情歉疚,也無法拭去那一抹傷痕!然後,有很長的一段時間,不敢再聽,就像心中不敢觸及的秘密,怕其根莖有滋長延伸的生命力。

剛在FB上見一友人分享,說不知為何聽這「天空之城」哭了?我沒有送上問候,因為感覺從來是無字的。這刻的欲淚同感,却勾起我早已沉寂的思緒來。於是借來片段,問聲︰如今你可好了嗎?

<久石讓 800 人大合唱天空之城>


補貼歌詞︰

作詞:宮崎駿
作曲:久石譲

在閃閃發光的地平線那端
是因為有你在我後面
點點燈火是令人如此懷念
是因為你在其中
在那許多令人熟悉懷念的燈火之中
哪一個才是你所在之處?
出來吧!
用一片麵包、刀子、火把 裝滿皮包出來吧
還有爸爸留下的熱情
媽媽眼中的深情
世界不停地轉動
你卻隱藏在其中
閃耀着的眼神 像閃耀着的燈火
世界不停地轉動 伴隨着你
伴着我們 直到我們重逢的那天
還有爸爸留下的熱情
媽媽眼中的深情
世界不停地轉動
你卻隱藏在其中
閃耀着的眼神 像閃耀的燈火
世界不停地轉動 伴隨着你
伴着我們 直到我們重逢的那天

 

2010年11月18日星期四

突然好想食雪糕

昨天中午自己一人外出食午飯。食完一個枯燥乏味的二餸飯後,心思思很想食雪糕,注意,是很想的想!要知道我已很久沒有刻意買雪糕給自己食了。猶豫緊要不要孤單一人行落個大斜去買雪糕時,雙腳已拾步往回走,但走不了三幾步,大腦又發出強烈想食雪糕的信號!我知我如果不能立馬食上一啖雪糕,我到夜晚上牀前都不會有好日子過!去!去買!我的人生還會有幾多這些霎時衝動呢!

去到7仔,一向給我混亂感覺的價錢牌,呢次又好清晰明瞭喎(係我睇明白了)。二支雪糕磚加一個雪糕杯的優惠裝,盛惠$38.8,我覺得好似好抵(少買,點知抵唔抵),於是選了這款。嘿,有冇人陪我癲下呀(咁啱你又有點空閒)?你認為我會食邊樣先呢?

對了,昨天我食雪糕時正好睇緊篤撐維園阿伯篇,即時哈哈地笑了,但冇噴飯一樣咯!不過當時辦公室得我一個人,笑完我有啲慄!

2010年11月17日星期三

賣琴者言

那天在琴行接受護理鋼琴培訓。

職︰嗱,幾樣嘢一定要記住嘅!首先係拖地時,記得叫姐姐果把濕地拖唔好掂到琴腳。
我(在心中嘀咕)姐姐? (萬分一秒後明白)︰哦!

職︰跟住呢,記得叫姐姐唔好擺過多嘅裝飾物係琴頂上,至緊要記得叫姐姐唔好放重物在上面。
我(呢次好醒,完全明白)︰知道!

職︰仲有就係留意住濕度變化,潮濕天記得叫姐姐擺部抽濕機係琴側跟抽濕。
我(上咗身)︰係!知道!

職︰買專用嘅清潔劑給姐姐...
(下刪幾百字都係關於我要吩咐家中姐姐做的事)

原來賣琴者視買琴者、彈琴者及姐姐為一黃金組合,嘿嘿!為買部琴我近來已開始節衣縮食了,再請埋姐姐,我難保不餓死街頭呢!臨走前,職員還咬住我家姐姐不放,我終忍不住笑道︰我咪果個姐姐咯!

同場加映︰
昨天我掃地中途接聽電話,順手將掃把放在琴側跟,然後我聽見說,姐姐,掃把唔好放在琴邊,一唔小心好易刮花琴架!

我︰咩事呀!想點先!@#$%&@#$%&

 

2010年11月15日星期一

時來運轉

今日中午十二點,琴送到家了。哪天想拿起相機時,我會貼張相上來的。

#  #  #  #  #  #  #  #

安置好部琴,我外出去二間銀行。去到第一間,見只得六、七人在排隊,心中暗喜。殊不知在這間銀行排了足足四十分鐘才到我!等到忟!起初開了三個窗,整下得二個,其中一個職員可能去洗手間,但返來後竟然幹起數錢的行當來,真係忟死人了!原來平日的銀行是可以如斯謀殺時間的。仲有就係,有一個窗口的客人,由我排隊起就見佢在其中一窗口了,到我走佢可以仍未走得,到底出了甚麼問題呢?她要做的是將幾個戶口合併,將乜卡物卡統一,好難架?我由那間銀行出來,一定如塊忟薑 一樣!

原本約了人2:30pm,推到3點。去到第二間銀行,死得!有成二十人排隊,我心中宣佈放棄,即使我身懷「巨款」,點排呀?等得來蚊都瞓了,我諗住打下簿就走人。點知打了三次都打唔到,最後果次顯示壞機,同銀行聯絡咁上下的字眼。我死死地氣去找職員,又真係估唔到,個女職員叫我係優先隊等,哈!又會咁死好運!埋得去窗我點會剩係打簿呀?優先隊冇人排,埋去就到我了。職員幫我打完簿後問我需唔需要取錢存錢等等,我笑到蓮子蓉口面(要用手袋放在窗檯遮住半邊面,以免身後排長龍的人客轟我走),說,我要存錢!職員被我感染到笑埋一份,說,好呀!存幾多?我說,存X萬(用來找琴的卡數)。

銀行出來後我一直開心不已。諗住無奈下惟有身懷「巨款」去赴約,却又莫名其妙被打救了。

PS︰後來我才想起銀行應該有自動存鈔機,是我生疏了。
 

2010年11月14日星期日

問路

我無方向感,我知,但路人不知,而我是經常被路人甲、乙、丙選中來問路的。我沒有讀過有關這方面的行為心理研究,說不出其中有學術性的所以然來,以我膚淺的理解是,因我樣子平凡得來帶誠懇,臉帶笑意絕無攻擊性。向我問路的路人甲、乙、丙,包括有本地人、內地人、台灣人、日本人、韓國人、菲律賓人、歐美人...不能盡錄!

講到問路,想提最近一次被問路的經歷。那天我行經上環,有一位三十多歲的女人,從我後面趕上來,用普通話問道,你會說普通話嗎?我笑答會。三十多歲女人問贊育醫院怎樣去?恰好是我識的,並正好我要去那附近。我解釋了幾句後發現頗費解,索性叫那三十多歲女人跟我走算了。三十多歲女人一路上向我表明自己的身份,上海人,住瑪麗宿舍,到贊育醫院上班有一段日子了,是次坐巴士坐多了幾個站,所以不知怎走回贊育。三十多歲女人還介紹了一些自己的事,我似聽非聽,接著她問我的情況,我側頭望下她,以一淺笑封了她的詢問。我對陌生人的情況興趣不大,更無意向陌生人透露自己的任何,我將對話拉扯到路段、地點上,某通道在何時段可用等,但我的直覺告訴我,三十多歲女人對我所告知的毫無興趣。

和三十多歲女人分手道別,行了十多步後,我回頭望了望她,忽然間,不知怎的,我心生出一種感覺,就係我覺得那三十多歲女人不多像真是問路的,她給我一種志不在此的感覺。

2010年11月11日星期四

總有盲點

我在記地方認路向方面可以講係超級白痴一名!除非日日行經的又或曾經是日日行經的,否則去過多次的都是記不清。最弔詭的是,記憶中幾乎每次新去一個地方,即使係只得二分一選擇機會,我都會鬼使神差地選了錯的一方,這種心慌慌下的錯誤判斷,似乎已成為我認錯路的固有模式,而且是越驚就越錯!

搭錯車落錯車的事情固然常常發生,而說來更難為情的是,曾二次回家出Lift後轉錯方向,攞鎖匙開別人家的門,然後聽見屋內有人說︰咦!邊個呢?嚇得我落荒而逃!!恨不得阿媽多生了我兩條腿!如果立時被人「捉拿」住,天啊!就算善良的人家沒有當我是壞人,那一刻也免不了將我和白痴聯想在一起。

我對坐陌生路線的巴士有極恐懼感,天曉得!因常行錯路,於是自然就行了很多冤枉路,但日子有功,多行路間接令我愛上了步行。大腦判斷失誤,雙腳累死仍樂此不疲!

如果說我記性差,又不是喔!我最早期的記憶在一歲時,信不信由你喔。
  

2010年11月10日星期三

當咖啡遇上糙米

咖啡可能已成為我的心癮,不過我都算節制到,一日一杯好了。近日,我試著將在點點綠買的糙米粉加落CappaRoma LowFat三合一炭燒咖啡,一起沖來飲,嗨!竟然意想不到的好啱我口味!

炭燒咖啡.糙米,聽落都覺風.馬.牛不相及的事情,被我胡攪蠻纏地撮合了。同處一杯子裏,溶化在熱水中,却誰也沒有因對方而有所失色,咖啡香味中融入了糙米的糧香,於我,兩者是那麼的相得益彰。真是我杯茶呢!

我會稱之為炭燒咖啡糙米,亦或糙米炭燒咖啡呢?我屬意後者!咖啡伴我多年,其江湖地位怎能輕易動搖喔!

 

2010年11月8日星期一

誰之失

受一位搭上搭朋友所托,去幫手買幾件施巴的孩子護膚用品。週末去了某間其中有賣施巴系列產品的專門店,一問即有,過程很順利,付款離開。

出了門後,我看下手上張單據,發現店方將所贈送的二細包不記得是甚麼的試用產品,打上$36,又再減返$36,然後總件數比實際須買的數多一件。我覺得有點不妥,為免在收返朋友錢時費口舌,我折返店子,同店員講,可否不要贈品,我希望張收據只列印著我所買的數量,或者用手寫張收據給我,而我將機單給回貴店。店員稱自己是新來的,程序不熟,要致電問下。一輪不短的電話(我已開始不耐煩了),然後,店員答覆我,問過了,可用手幫我在機單上劃去一件產品來解決,我差點沒暈低!沒好氣地說,你劃去同我自己劃去有何分別?我稱我幫內地人買,托上托的,再托人帶上去,不想為張單要解釋一輪,你手寫張單給我吧!阿店小姐說,問過了,店舖規矩來嘅,不可隨便使用收據簿寫收據給客人。我心在諗,出「殺手鐧」吧!於是,我說,如果你唔寫過張收據給我,我唔買了,煩麻你退回錢給我!諗住點都唔會有生意唔做掛!點知店小姐手拿收據簿窒咗下,但還是說這是佢哋公司嘅規定,唔寫得收據。

店小姐幫我出機辨退款時,我默不作聲,但講真,可能一臉不屑!是對間舖的管理很不屑!不知是指令不清還是店小姐資質有限,所以演繹不當,有乜理由會為一張收據而失去幾百元生意!不知幾百元對一間舖面不大的公司是何數目,但假如真的為單據問題而趕客,那怎會是幾百元生意的問題?單單我吧,佢哋可能趕走了一位日後常會光顧的人客,我本身雖然少用施巴,但我深圳有搭上搭的一些朋友嘛,舉手之勞的事,我樂意幫人,仲要好多時佢哋本身唔知該買邊種,信任我由我話事的。

由那間舖出來,我轉去藥房買。藥房價錢較平,我當然知,只是原本諗住果位內地朋友小康生活,只得一個二、三歲的孩子,叮囑買香港人常用的,買好的,(其實我經驗不多),我只想到施巴,然後慎重其事才到那店舖去買,點知......

2010年11月5日星期五

心理潔癖

每日返工搭地鐡,見見埋埋唔少難頂的現象,( 我可能有心理潔癖 )。

首先,今早在尾二站後,乘客少了很多,一、二個人坐整張位的比比皆是。我對面坐了位女仕在翻看報紙,旁邊坐了一位男乘客,佢哋中間隔了一個吉位。我見個男人側個頭過去睇埋一份,起初我以為有咩特別新聞吸引咗佢,原來唔係,女仕揭去另一版時,個男人依然如斯驚死人唔知咁伸個頭過去共享份報紙。我心諗睇下個女人忍到幾時,哈!女仕又冇嘢喎,仲特登向男人果邊攤開啲咁喎。俾著我,實郁下身側咗下眼架喇。不過,其實係咪有問題果個係我呢?你介唔介意在地鐡同三唔識七的人一起睇一份報紙呢?

講開又講,在地鐡難免陌生人之間近距離接觸,同陌生人近距離接觸下,你哋覺得最難頂的有啲乜呢?我想大家答下我的發問,等我睇下我覺得難頂的係唔係同大家大同小異,定係我唔夠包容呢?不過答中無獎架喎。:p

2010年11月4日星期四

個sales可能想打死我

家母一位久未聯絡的朋友,昨晚打電話來。我告訴家母長居內地,然後和我閒話家常起來。有時,我真係對冥冥之中呢樣嘢呢!...唔知點樣講到買鋼琴,原來家母朋友的二名已長大的女兒都有彈鋼琴,一個演奏級,一個八級,家中曾先後買過二部琴,一部歐洲琴,一部日本琴。她一聽我話買了部歐洲琴,即刻極力反對!她說香港潮濕天氣不適合用歐洲琴,鋼琴主要由木製成,日本樹木生長在海岸,所以較適合香港的海洋性氣候,而歐洲琴難抵香港的潮濕,一個不留神,鋼琴的木受潮變形,到時已不是多調幾次琴可解決的問題!
我一直都記得Hana給我的忠告,但因敵不過歐洲琴圓潤超班的音色而敗!從這可看出我是個很重感覺的人。

家母朋友繼續講,保養唔好,一部歐洲琴可以十年玩完!而保養工夫很難做到家,因為要長期keep在40-60的溼度,是談何容易呀!所以香港鋼琴二手市場,日本琴比歐洲琴更有市有價。

我清楚記得潮濕天時,家中牆滲水的慘況!!

再上網睇用家評論,原來又是一面到偏向買日本琴的。於是,我頭開始隱隱作痛!鋼琴還未送來,我思考了一天,終於都打出了更換的電話。始終還是KAWAI K-8 AS!我暈了,我可能係史上買琴最麻煩的人,人哋可能買樓都冇咁多思前想後!!

2010年11月3日星期三

兩把尺

有網友提醒話版面好暗,睇字辛苦,這我倒是一直冇為意。轉吧!

然後舞足一晚,但總覺得都未很合心意,大家將就睇住先呀!就下就下就慣就一世架喇!反正常聽說人生苦短,苦係味道,各人味覺有異,你話苦佢話甘,準繩難握,但短呢家嘢就有基本共識嘅,話得苦短,就算依張三嘅味覺係甜,換了形容詞,都係短吖!

不過,每人心中有兩把尺,本來唔算多,只不過一把用來度人,一把用來度自己,度別人的可精確至毫米,再加放大鏡,度自己的則可以任意伸縮。這樣,是短是長呢?

( 我都唔知自己講緊乜!) 

 

2010年11月2日星期二

我是無聊人

我大部分時間都基本上是個很無聊的人。

今天朋友轉告,佢罰一名學生寫篇文,學習用比喻。

#  #  #  #  #  #  #  #

題目︰我心中的媽媽

我今次要介紹我媽媽。我的媽媽外表平凡,高矮肥瘦適中,不高不矮,有戴眼鏡,所以給別人說︰「四眼龜」!但她漂亮極了,她漂亮如花。她平時喜歡打羽毛球,所以她有空時會打羽毛球。

#  #  #  #  #  #  #  #

為此,我這個多一個唔多少一個唔少的無聊人,又著實笑了一餐!
Related Posts Plugin for WordPress, Blogger...