2009年11月30日星期一

煩惱絲三千

一把長髮留了十多年,不是不捨得剪,而是實在找不到更適合的髮型。本人頭髮天生有少少卷曲,如留短髮,那天然微卷人人都以為是電過的,曾有人不知幾羨慕!只是那髮質太難打理,常要抹些甚麼去作固定,否則一頭鬆垮垮的頭髮好像剛從床爬起來一樣。靚,誰都想!但靚是要經營的,大冬天一早爬起來Gel頭!我情願瞓多五分鐘。所以我不喜歡自己曲卷又極不貼服的頭髮,發夢都想有一把唔洗點打理的貼貼服服的長髮。

約十鬆啲年前,香港引入了負離子直髮,在相熟髮型師極力推介下,我大膽一試。那一試非同小可,直髮效果可維持大半年以上,而且不需任何甚麼定型水去固定,每朝隨意梳梳便可出門,省回不知幾多功夫!我愛死了這負離子直 髮,從未覺得花錢花得咁值!如果我曾肉痛那千多元,後來我是100個認為值回票價了,我興奮地向友人宣稱負離子直 髮是當代最偉大的發明之一!!這咁多年來,我每大半年就做一次負離子直髮,價錢倒是越來越平,比當初平了一大截,但就恨死了每次均要固定坐姿四至五粒鐘,雖然我已極有備地帶上遊戲機、小說、數獨填寫...但那種固定頭姿的幾小時的呆坐真的苦不堪言,腰酸背痛、腳部麻痺...然而,這十年來,我還是樂此不疲!!

近日見頭髮又開始蓬鬆,計下,上次做負離子直髮至今又大半年有多了。但不知何解,我似乎未有意欲上髮型屋,轉性?莫非...?哎呀,都係唔好自己嚇自己!不過,事但啦,用髮夾頂住先。昨日上街,經過賣頭髮飾物的店舖,走入去湊下熱鬧,哈!倒也讓我找到三幾件合眼緣的髮夾,今天,其中一件率先上陣,以夾起我的長髮作己任了!

2009年11月25日星期三

功課要重做

今晚畫班幾乎個個都被老師「鬧」,原因是所有人上星期那幅功課畫得唔認真,全部要重畫,無一幸免!

即是那幅「鴨子」,我那幅底色幾好,但鴨子太瘦,無'pet pet',我力挽狂瀾︰老師,我畫的鴨'pet pet'是有的,只是沉咗係水入面。老師瞪著我︰你的鴨尾毛畫得咁高,點沉呀?我死死地氣細細聲說︰緊係想畫瘦啲架喇!瘦啲靚呀麻!唔通畫個大'pet pet'應景咩!點知我咁細聲都被老師聽見,老師笑我︰宜家叫你畫鴨喎,叫你畫咩呀!同學們都在笑!不過,有人差到老師一看即掉回幅畫,並送上一句︰重畫!

然之後,今晚這堂,老師由指點第一個同學開始就語氣頗重,差不多到我時,我臉上堆笑說︰習畫之人來喇,習畫之人來喇!

可能個個都被老師話得無咩心機,落堂時老師話︰今晚我請大家飲嘢!
但一個二個雞飛狗走!

風月,你啱,我想畫月色,實質是黃昏景!

2009年11月22日星期日

暖暖冬日


將大自然氣息帶回家!





2009年11月21日星期六

寒香


冷豔寒香


(  當年譚Sir叫我和降霓一起跟他習畫,我說我不喜歡畫畫!!沒有學。真想問譚Sir,如何看出我是喜愛畫畫的,原來我真的很喜歡。不過,今天實在畫得太多了!)


夜色

夜色迷濛



2009年11月20日星期五

擺上枱

前晚返畫班,肥師姐坐我隔離。

肥師姐︰陣間落堂去唔去食嘢?
咖啡︰ 我食咗飯喇。
肥師姐︰咁你飲嘢呀。

肥師姐在我們這個畫班係幾領導型的,又送過宣紙給我(證明咖啡貪小便宜)。

咖啡︰ 嗯嗯....但咁夜食嘢好易肥喎...
肥師姐︰得喇,我咁肥都未驚,叫埋老師去。
咖啡︰ 吓!

仲有二十分鐘才落堂,肥師姐開聲了,

肥師姐︰老師,新同學(咖啡)來咗咁耐都未一齊去食過嘢,唔夠關心同學,陣間落堂去飲嘢呀?各位同學,一齊呀!

除咗一位同學有事要趕住走,其餘全部同學竟然一窩蜂和應。我無諗到肥師姐擺我上枱,但見老師和十位同學都話好,我惟有在枱底輕輕踢肥師姐一下以示抗議。接著一個二個勁快執嘢,未夠鐘落堂已要求老師落堂!

肥師姐是個幾硬朗的女人,說話很風趣。食嘢時她擺了自己女兒上枱,明明是投訴女兒學校的老師未處理好事情,她却描述得讓眾人笑了。肥師姐女兒應該是天生麗質,學校都幾多男同學追,有男同學甚至為她打過交,而女同學就很憎她,在老師眼裡肥師姐女兒是始作俑者,是無心讀書的壤女孩。老師請肥師姐回校商討如何管教女兒,肥師姐說啲老師很針對她女兒,當正女兒是紅顏禍水,肥師姐說越聽越火滾,來氣了,她望著那位男老師,一字一句地說︰老師,我由剛才踏入校門,一見到你就喜歡上你,我很喜歡你,老師你是否應該檢討下自己有咩問題呢?

我們就是聽到這裡大笑起來的!

2009年11月19日星期四

2009年11月18日星期三

Why Me !

今日午餐同事們各自修行,天寒地凍我唔想似對面的吃碗仔面,所以自己一人外出諗住買個甚麼回來吃。經過咖哩店,想食咖哩,加上唔想行太遠,便決意買咖哩魚柳飯再跟個熱騰騰的靚湯,正!

行入這間主力做外賣的咖哩食店,估唔到只有二位食客在坐,因平日這間微型店是常滿座的。於是我改變主意,不外買了,選了張靠門口的枱坐下。外賣高峰時間已過,所以我的食物好快送上,香甜不太辣的咖哩正好驅寒。我大約吃了六分一時,很多人客到,其中有三個在附近工地工作的工人,坐在了我這張四人枱,要知道,為配合店舖面積的細,這裡的枱亦是特別細的。

本來,搭枱之麻,平常事,但他們三人一坐低,由看餐牌起就差不多句句說話都夾雜粗口,不是單音果啲,是幾字幾字的真粗口!我已無法再進食,和他們一起坐在一張細細的餐桌,無可能扮聽唔見的。我的心在叫苦,Why Me!有咗前晚巴士的前車之鑑,不能再委屈自己,我好快企起身,稱食物份量多,要打包走。可能啲工人意會到是他們的說話趕走我的,然後粗口消失了,被他們察覺我的想法,而他們可即刻不再說粗口了,我反而有些唔好意思,不過我都不會再坐下繼續食喇!終於都是要外買拎走回去食。

2009年11月17日星期二

體味侵犯

我有個習慣,如果當天發生的事去到第二日仍不時記番起,我便想將之寫下來。

昨天放早,我預約咗去MB做facial,之後再沖埋涼,感覺好舒暢、清新,塞上耳機邊聽音樂邊等巴士回家。好快,車來了,我見下層都多人,便上樓上,車尾還有二排位無人坐,我行到尾坐在其中一窗口位,跟我身後有一家三口,夫婦及一名約16、17歲的女兒。那女兒行在最前,選坐另一窗口位,媽媽行第二,在她未坐下前,我以為她會坐我隔離,但她竟然坐在女兒旁邊的位,剩下她老公便坐係我隔離。

那個男人一坐下,我聞到他身上一陣勁難聞的刺烈的煙味!那刻我才知,原來有時無奈之下聞到別人燃點著的二手煙,並不是那麼難頂的,討厭,可能其中大部分原因是因二手煙侵犯了自己的人權。而一個人的細胞、血液被煙燻透後,再由其身體皮層毛孔散發出來的臭煙味,那才是極級難頂的剌臭!!!!那刻,我想起身轉位,但又做唔出呀!然後我在心責怪他老婆,明知個老公咁臭都唔提佢注意,可能多飲湯水或多飲些甚麼涼茶,都唔至於咁臭咯!況且家中有個16、17歲的女兒,花樣年華的女孩子多要漂亮、多要清新呀!是習慣了嗎?

在平日,我總覺得約半粒鐘的車程有些短,想坐耐少少多睇下窗外風景,但果刻,我如坐針氈,同時作最最微弱的呼吸,祈求快啲喇快啲喇!我將身體坐前,仍聞到,將頭擰去埋邊,仍聞到,真的真的頂唔順!我記起手袋有支香水姐姐送的香水版仔,好像發現救命稻草一樣,我手持香水版仔半掩鼻呼吸,好些,但如手稍有被車的晃動振開,又聞到!嘩,簡直係惡夢!剛才上車前的清新已離我十萬八千里遠了。

那一家子早我一站落車,我方能呼吸!

回到家,我第一時間再沖涼,但首當其衝的鼻子,到現在仍未完全逃離那陣刺烈!

2009年11月16日星期一

一件小事

補記上週末在深圳一小事︰

我之前在深圳刻咗個印章,完成後不太喜歡,趁上週末要去深圳,我帶咗果個印章去,諗住作修改。我央求一朋友陪我去,泊車在附近一露天停車場。我們上去那間小型文化書城,一問,原來不是我想像中難磨。一職員簡單問過情況,即刻叫我再另選字體,話會請師傅磨平之前的,再刻過,超順利搞掂!早知係咁,我自己一人都敢去!之後我買了些宣紙、二支毛筆、二個筆筒,走人。

駛車出停車場時,有個似職員(因無著制服)的人很快伸手過來拿卡去泊了,打出$20,朋友俾完錢,我跟口問︰「深圳泊車咁貴架?」朋友沒有即刻應我,因為已覺察到有些問題。這位朋友的車是公司配給,連油錢停車費都提供,所以經常都是泊完車,取單據就完事,沒有太深究每次泊車的銀碼。這時,朋友開聲了︰「我知啦,停車場果個人應該手持另一張卡,趁我無留意,佢泊佢手果張,所以咁短時間竟然$20。」

朋友應該不會去求證自己的諗法,不過就說︰「法制不健全,甚麼時候都要打醒十二分的精神!耍把戲的是無處不在!」我笑住回應︰「中國人就是這樣磨練出來的麻!」

之後,朋友在深圳地標「萬象城」泊車,泊了大約二、三個鐘,收費$10。

2009年11月15日星期日

我看你好

聽回來的故事︰一對高級知識份子夫婦,男的在某大學任教,女的(在此省去)。在這個家庭,知識和財富較垂手可得,所以夫婦更著重孩子能否快樂成長。仔仔讀小學了,但很快就被老師投訴仔仔無心讀書,差不多上所有堂都伏在書桌瞓覺,媽媽應邀去校見過老師,亦同仔仔傾過,但無改善。第一次考試後,媽媽問仔仔識唔識,仔仔話唔知自己做得對不對,不如他寫出來呀,於是他將中、英、數卷連題連自己的作答一併默寫出,媽媽驚訝了!後來派回試卷,三科均滿分!!媽媽再應邀去校見老師,學校估計仔仔是資優生,叫父母帶仔仔去做智力評估,但同時建議父母帶仔仔去看精神科醫生,因為發現仔仔還有些少奇特表現,即是常有自言自語的情況出現,仔仔自言自語的情況父母是知道的。

父母很矛盾,他/她們不想帶仔仔去見精神科醫生,因為怕萬一兒子被標籤!但又怕萬一有事,未及早做好準備!終於都帶仔仔去做了次初步會診,仔仔有問︰「我係唔係有精神病呀?」。不過之後夫婦決定暫時不再帶仔仔去見精神科醫生了,亦不會帶兒子去做智力評估,夫婦決定當仔仔是平常孩童一樣去對待,他/她們只想兒子好像其他平常孩童一樣,他/她們很怕為仔仔標籤上「神童」或殘酷的「神經兒童」。夫婦同學校恊議,他上堂要瞓就由他瞓吧,只要不影響到上堂就得了。

三毛

每次去深圳,幾唔夠時間都要擠點兒出來逛書城,否則我會覺得深圳之行若有所失。是次我買了十八本書,其中有三毛在大陸的再版《三毛全集》,可惜未能買齊全套十一本。三毛的作品早年已拜讀,年青時我唔迷愛情小說,我看每個流行作家杜撰的愛情小說都是一本起二本止,但對於三毛的寫自己、寫見聞、寫世情,我很愛讀,特別是三毛以自己挫敗過受傷過的心去寫生活,讀來親切感人!











2009年11月10日星期二

秋色

跟大隊的秋季郊遊,我惟有寄情攝影。在過往年代,我今日是大開殺戒了,哦,螞蟻都不願殺的我,謀殺的只是菲林!幸好,我沾了數碼時代的光,生平頭一遭如此細心、忘我地拍攝身邊不多起眼的花草,在未刪除一部分前,我竟然拍了三百多張!











2009年11月9日星期一

蘭質

近日畫多了荷花,引起我對花的迷思。其實我對這出於污泥而不染的清雅高潔的荷花感覺不大,我最喜愛、最能抓實我心我感的應是清幽的蘭花。蘭花,即使未綻放時,就她那身素素的婀娜長葉,這蘭花草已是質樸脫俗,等到了開花時,秀雅的花影、淡雅的花色、幽雅的花香,足以讓我良久迷戀!

曾執起畫筆畫蘭,但不論是蘭草或蘭花,畫出的均不是蘭!不是我心目中的蘭!

2009年11月7日星期六

有一種緣份

人和人之間是要講緣份的,就像和她們,比和旁人多了些說不清的緣!

今日偶遇在上環B仔記

我說喜歡她頭上的小蝴蝶,她就變著花樣將不同的蝴蝶別在頭髮上,真逗!


吃了金沙,再為我可愛的玻璃樽裝滿豆兒,搵日,我要為我儲下的所有玻璃樽來張大合照!

2009年11月5日星期四

老師不在輕私語

今晚返書法班,書法老師剛行開一陣,啲同學就急不及待拉開話題。

甲同學︰果日報紙講係觀塘非禮果個衰人,我被佢撞過架,我當時無鬧佢,諗住自己又唔係靚,怕冤枉咗人!
乙同學︰你又認到係佢?
甲同學︰我認到佢件格仔衫!
丙同學︰可能佢專著呢件衫犯案!
丁同學︰可能呢種衰人中意著格仔衫!
聲討開始轉型,有人在笑...

乙同學︰我講我的經歷俾你哋知喇,果次我俾個仲高過我的人撞(乙同學頗高),起初我又係諗住人哋唔小心,點知我望下佢果時佢偷望返我,佢嘅眼神出賣咗佢,我好嬲,即刻追上去狂鬧佢。唉,點知,之後有一次我有個朋友生日,係朋友度撞返果個人,好尷尬!
丁同學︰咁你有無同你朋友講呀?
乙同學︰無喎!佢係我朋友契哥!

聲討繼續轉營...

甲同學︰我今日經過公園見到成班女人係度跳民族舞,睇真啲原來中間無啦啦有個男人又係度跳,不知跳得幾投入,我總算明白鶴立雞群點解了!

聽到此全體哄笑,我笑著哀求不要再講了,我的醜樣毛筆字已夠醜樣喇,陣間實俾老師話!正好老師回來,立即靜番曬!我寫緊的字就全部是歪歪斜斜的。

2009年11月3日星期二

朋友



K好耐都無搵我食飯,今日搵得我緊有啲嘢嘅。果然!係「和民」一坐低,未幾K便開始講佢TB教練的故事給我知,未講前,我在心諗︰你終於都講喇!因為我曾和另幾個朋友懷疑K是Lesbian已有好一段日子了,不過出於厚道和尊重,我們幾個朋友聚會時,輕易都不提及這敏感話題。

故事大約是這樣︰TB教練和前度女友散咗,有一新女趁機埋了教練身,二人開始拍拖了,但教練仍喜歡前度女友,所以對新女並不是很投入……我唔關心TB教練喜歡邊個,我剩係想知K是否教練的前度女友?睇出我內心的疑問,K中斷了說話,急忙辨明自己唔係,說自己是喜歡男性的。但我又明明聽到K說︰如果我肯,新女完全不是對手,邊都企唔到!不過我甚麼都沒有問,想講的時候自然會講。

2009年11月2日星期一

心頭好

友人得知我近日習書畫,記起家中有套毛筆,是十多年前一內地人贈送的,友人說繼續收在家中亦是得無所用,不如轉贈給我。我心中大喜,但口頭上都跟友人客氣了一番,友人知我扮嘢,即揶揄道︰知你學書畫人,好清高嘅,唔好要囉!然後我們都在笑,哈哈...

今天我歡天喜地收下這套筆,謝謝!


Related Posts Plugin for WordPress, Blogger...